Luk 11 | MCQ | STEP | Na'ia pina Hu kwaa pini hine siporua'e 'onana. Hu 'ojume pa'are'eme Huni tisaiporu pini roe ijá 'wama Natohwe areri Jonira huni tisaiporu najaha ja'ina'e siporua'e 'ohuniji najuha 'wamana.

Luke 11

Jesura Siporua 'Ohuna Najahajina

(Matiu 6:9-13; 7:7-11)

1 Na'ia pina Hu kwaa pini hine siporua'e 'onana. Hu 'ojume pa'are'eme Huni tisaiporu pini roe ijá 'wama Natohwe areri Jonira huni tisaiporu najaha ja'ina'e siporua'e 'ohuniji najuha 'wamana. 2 Hu ijá 'iama Ja siporua ika'ina 'o'avara.

Amo Oni iha niho'o nimaa nimaa'omo A roa nú 'ajohua. 3 Vea kwinu kwinu 'iruma ka'ene areri ihuniji vajúha. 4 Núni sisea vwihanúa arema. Ijihuni maijaho nú 'u'o ea 'ahopo sisei 'ahúujaho nú vwihanie arevura. 'Ene paaherume vena kivuri vajijaho va'amana 'iamana.
5 Hu pu ijá 'iama Ja ei pini napura rukina'e re'ira'omo na'ia rira mu'oi va'e ijá 'wava'e napura nune puretia no'opiso vaji'irakúne na túna'i oni puretia eha vajahuna. 6 Ijihuni maijaho nuni napura kwaa jori rene roe iviamaa nuni sei roana kaivo nara unekaka mahuna pa'ajihuna'e 'waravu 'wamana. 7 'E'eje oni napura kajara kahino sea vaji eha vene ijá 'wa'ipisa Siuna arema na vwicha nikume sesahu nu pu'úmo ninejura'omo na pa'urine uneunecha 'eka vajahuna 'wava'a. 8 Na jaa'e 'waravu. Hu pa'urine pureti pamaha kaivo a huni napuri roe paju'ika'i hine jarimujihunihahi hu 'urine uneunecha mapoka ka'ene hu icháru ura renujaho vajaha'a. 9 'Enajihuna'e Na jaa'e 'waravu. Ja hine jari'avajaho vajihuna. Ja hine sara'avajaho piunihuna. Ja hine 'ana'ana'avajaho tirausahuna. 10 'Ene ea irara jarimujaho hu 'ekuna. 'Ene ea irara samujaho hu piunimuna. 'Ene ea irara 'ana'anaujaho jara'usahuna. 11 'Ú ja omahwaha harihu jopo roe kija'e jarira'ipisa ja tapara'e vajiha'e? 12 'Enavo pu 'u'ora kuha'e jarira'ipisa ja suaka vajiha'e? 13 'Enakaivo ja ea siseakija joni harihija swara mamai vaji'avajaho joni Oma ka'ene akúpa 'ahi hinuji jari'avajaho Hura Huni 'Avena mihuna 'iamana.

Jesune 'Ee Pierisiparu

(Matiu 12:22-30; Maka 3:20-27)

14 Hu 'avena sisea ka'ene ira pa'waravi'inijaho 'waravume 'e'una va'eme ema kajaho aneja vene ira 'waramana. 'Ejume ea mapoka kajija niho'o oja hwa'usahara. 15 Ea 'aho'a ijá 'wava Ea ikaho Pierisaparu 'avena sisea puni natohwijara harura mahu'e 'avena sisea 'waravu'e usevu 'wavara. 16 'Ejume ea 'aho'a Hu vena ka'i 'ahiume 'ejahae ijá 'wava Veje aacha pina akúpa 'ahi rene roa kava 'wavara. 17 'Enakaivo Jesura iraka ka'ene pura vwihajajaho nikimarena ijá 'iama Kwaa ara irahipo irecharame va'e nia ani ani hine 'arahi'i hi'ipisa pa'areja'a. 'Ene ara irahipo ahaama hi'ipisa ariha pa'areja'a. 18 'Enajihuna'e Setanira ahaama hi'ipisa huni kwaa arijaho ichá'ina'e namija'e? Ijihuni maijaho ja ijá 'wavo Na Pierisiparu oni iha 'ahi 'avena sisea 'waravu'e usevu 'wavu. 19 'Enakaivo ja vwihajujaho Nara Pierisiparu oni iha 'ahi 'waravu'e 'avena sisea usevu 'wavu kaivo joni harihija irahuni iha 'ahi 'waravu'e usevure? Ijihuni hahi pura joni 'otua vehuna. 20 'Enakaivo Nara 'avena sisea ka'ene 'waravu'e usevujaho Godoni ijijara reju'e avaujaho Godi oni arijaho ni joni roana. 21 Ea ka'ene harura rukinijara huni ara juha hajaa vene 'ajohujaho huni kukua mamaa navura. 22 'Enaka'i ea ajisina huni ajira asimajara roe 'anae huni juha hajaa ka'ene hura 'eke tarera veji'i hinujaho 'etujahe huni kukua vajúsarama 'ekura. 23 'Enakaivo ea ka'ene Na hu'úmo parenujaho hu Nuni pwina pana. 'Ene ea Na hu'úmo parene ea nianaujaho hu veju'e pu jirijiri varanavura.

'Avena Sisei Kú'o 'Unama Roajina

(Matiu 12:43-45)

24 Vea ka'ene 'avena sisea emahuni haha 'ahi hinujara ru'e'unujaho hu va'e kwaa toa pa'ajino va'e ojuta hwehuna samujaho pakamuna. 25 'Enare'e hu ijá rohune Na kú'o 'unama va'e ruha ka'ene nara hijujino va'uma. Hu 'unama vai'i kavu'e ruha kajaho ea pahiju kaivo túa 'anae amairiana. 26 'Enareje hu va'e napuhwaha 'avena sisea 'aho'a iropu no'o ajisinijija aherama roe ijí hihuna. 'Ena'avo maraku'ijaho eakaho sise'i hinana vo iviamaa sisei maa hina parahuna 'iamana.

Temara Nimaijina

27 Jesuho ijá 'warame pa'are'eme napara pini ea rira kajino 'urina ira ajira ijá 'umena Napara ka'ene Aa'e nahenae 'ee A musa vajahajaho Godi merajahana 'umenana. 28 'Enakaivo Hu ijá 'wama Ea ka'ene Godoni vu'a hene vejujaho ijihija Godi merajihuna 'wamana.

Emapo Areri Pavejuji Veja Ka'irono Mi'imi'ivajina

(Matiu 12:38-42)

29 Ea mapoka kajija Huni rora kajano ani re'eme Hu aneja vene ijá 'iama Ja ea ka'ene iviamaa 'urijakija niho'o sisea. Ja aacha sarama 'warivu kaivo aacha pina pamihuna kaivo Jona oni aachajiruna. 30 Areri Jonara Ninava opuni aacha renaja'ina'e Ema Puni Harihijaho iviamai ea ka'ene hiju jihipuni aacha rehuna. 31 'Ene vukú'o vea ka'ene Godira 'otua ve'amani veijino vea va'e 'onu karo'i puni kwinia ka'ene hinujara Godoni una'i ja pu'úmo namine namahuna. Ijihuni maijaho ike kwinia karo'i kwaa jori hinujaho roe Saramanira kora mamaiji 'waravume henana. 'Enakúne heha! Ea ka'ene Saramani asimani eijaho iviamaa iki joni vaji hinu. 32 'Enakaivo vea ka'ene Godira 'otua ve'amani veijino ea ka'ene Ninava orijija pu Godoni una'i ja pu'úmo namine ja namahuna. Ijihuni maijaho Jonara najahaji pu hena nimaa ronareja puni sisea arevara. 'Enakúne heha! Ea ka'ene Jona asimani eijaho iviamaa iki joni vaji hinu.

Haha Huni Hanaji'inijina

(Matiu 5:15; 6:22-23)

33 Ea pina naheha pa'ene si'uara vaja irechavu'e navura kaivo pu icha ka'ene naheha'e 'unamiuji 'unavu'e ea mapoka kavi'i roa ajivura. 34 Hahijihuni naheha ijaho niijina. 'Ena'omo joni nia kajara marana paranujaho joni hahaka mapokijaho maho'o hanana paranuna. 'Enakaivo joni nia sisera'amajaho joni hahaka mapokijija maho'o nutuma nahuna. 35 Joni haha vaji hanaji'ina ka'ene namujaho paveje nutuvi'ina re'amana. 36 Joni haha mapokijaho hanana na'i kaivo pina panutu'ipisa niho'o natohwa'e hanaja'a areri ja naheha 'ena irechavu'e namare'e hanana paraju ja'ina'e reja'a 'iamana.

Jesura Parasia 'Ee Varapa Tamana Najahi'iniji Namahajina

(Matiu 23:1-36; Maka 12:38-40)

37 Hu ijaho 'waravume pa'are'eme Parasia pini va'e huni sei 'iruma i'amarono ona 'waramana. Hu va'e 'aijua rori asuma hine 'iruma i'i 'ahaume venana. 38 'E'eme Parasia Jesu ka'eme Hu Huni ija paso'i ijume kamarena hu niho'o tatamana. 39 'Ejume Natohwi hu ijá 'wama Parasia kapusia 'ee tevua huraru sovura kaivo joni vajijaho niho'o nesa 'ee sisei ani rene navura. 40 Vwiha pa'akije 'ú Godi ka'ene hura venajaho vaja 'u'o pavenane? 41 'Enakaivo joni vaji iraka ka'ene navujaho ea ka'ene uneunecha pa'ajihi vajihakame joni uneunecha mapokakija mamai reja. 42 'Enakaivo Parasia joni eha sisea niho'o ni'ima'ura namu. Ijihuni maijaho ja taisia ka'ene Godi vajahajaho senisia 'ee siaa ani ani'ina juasi'i navujija vajihura kaivo ja 'unama maijaho pataarohe 'ee Godi oja pamahura. 'Enakaivo ikaho uneka ka'ene ja veji'i ea 'aho'a paasinamihune sa'ina avajura. 43 Ja Parasia joni eha sisea niho'o ni'ima'ura namu. Ijihuni maijaho ja Sinakoku vaji una'i ikikami hihuni tiniji ura renaura. 'Ene ja maketia vaji emaapo pu ja 'ajorahuna'e ura renaura. 44 Joni eha niho'o sisei namu. Ijihuni maijaho ja areri eucha ka'ene ea savaji pahena paki'i kaivo ijihuni toi 'urahoju ja'ina veju 'wamana. 45 'Ejume roia pini eha vene ijá 'wama Najahi'ine A ija'ina'e 'warumujaho núa'e 'uraruhe avanu? 'wamana. 46 'Enakaivo Hu ijá 'iama Ja roia 'u'o joni eha sisea niho'o ni'ima'ura namu. Ijihuni maijaho ja ea ahija mama'ina vaji'i kaivo ni'ajihe iji 'unira 'urihuna pana. 47 Joni eha niho'o ni'ima'ura namu. Ijihuni maijaho ja eucha mavarasa'ina poropeti epuna vejura kaivo emahu jopo 'aniume kwamasahara. 48 Joni amuhipo poropetia ka'ene 'aniajaho ja nihena kimare'e pura raka ka'ene veja kajaho nijina 'wavu. Ijihuni maijaho ja hine puni eucha amairie veju. 49 Ijihuni hahi Godira Huni vwiha vajijino ika'ina 'warumana. Nara Nuni poropetia 'ee apasoru irechamie vu'akame ea 'aho'a pu 'anie kwamasahe 'ee ea 'aho'a ruarahuna. 50 'Enajihuna'e ea ka'ene iviamaa 'urijajipo vea ka'ene mwe'a'e aneja vejajino rene poropetia 'aniajihuni eha apehuna. 51 Eporu ka'ene ea aririjihuni 'aa arihaji rena roe Jakaraia oni 'aa ka'ene Temiporu 'ee swasa vejuri 'aijua rira mu'oa kaji 'anaji ro 'e'unana. Na ja 'waravu. Ijihuni eha ijaho eaka iviamai hijukipo apehuna. 52 Ja roia joni eha sisea niho'o ni'ima'ura namu. Ijihuni maijaho hena kahuni kiijaho ja apena ruva'ara kaivo ja 'u'o pava aruvara. 'Ee ea 'aho'a ka'ene va'e aru'i vejajaho ja tanuvara 'iamana. 53 'E'eme Hu ara kajaho are'i va'ajaho Sikuraipia 'ee Parasia Jesuho niho'o apene 'urarahe uneunecha mapoka'e ani ani'ina apovara. 54 Ijihuni maijaho Hura unenu'u pina sisea 'waravakame Hua'e apena nama'irono avajara.